Novas de sa Segreteria (1)

Campidanesu

A sa Segreteria de is istudiantis de sa Facultadi de Lìtteras e Filosofia si podit lompi passendi de S’arruga de Trentino, assinuncas passendi de s’intrada de S’arruga de Is Mirrionis atruessendu sa Facultadi de Magisteru.Sa Segreteria de is istudiantis ammanizat is carrieras de is istudiantis cumintzendi de s’intrada in s’Universidadi fintzas a sa làurea e appustis puru; donat informatzionis generalis po fagher a cumprendher mellus is leis chi règulant is cursus de istùdius universitàrius.Si andat in Segreteria po:

  • cunsigna de certificaus e àteras attendèntzias;
  • s’intrada in s’Universidadi (immatricolazioni) e iscritzioni a annus chi sighint su primu;
  • tàccias e contributus po s’Universidadi;
  • pianus de istùdius e incurtzamentu de cariera de istùdiu;
  • cunsigna de is pergamenas, de is librettus e de is còpias de is documentus allogaus in sa Segreteria;
  • trasladamentu a àtteru cursu o a àttera Universidadi italiana, o fintzas de una Universidadi de foras de Itàlia a s’Universidadi de Casteddu;
  • s’acabbada de s’istadu de istudianti;
  • renuntziài a is istùdius.

Tottu is paperis necessàrius si podint agattai on-line assinuncas in s’uffìciu de sa Segreteria.Tottus is chi bollint chistionai cun sa Segreteria po preguntai informatzionis o po signalai calisiollat cosa chi no andit beni, o, ancora, po calisiollat consígiu, podint iscriri a s’indiritzu e-mail segrstudlettere@unica.it assinuncas podint sighiri is istrutzionis iscrittas in sa setzioni intitulada “Richieste e segnalazioni” de custu blog.

Logudoresu

Sa Segreteria de sos istudentes de sa Facultade de Literas e Filosofia la podides aciapare in bia Trentino o passende dae s’intrada de bia Is Mirrionis, peri sos palatos de Magisteru.Sa Segreteria manizat sas carrieras de sos istudentes chi s’assentan in sa Facultade fintzas a cando nd’essin e fintzas addabòi. E faghet comprender mezus sas lezes chi regulan sos cursos universitarios.Si andat in Segreteria:

  • Po leare sos certificaos e ateros pabilos de s’aministratzione;
  • Po sas novas de sos cursos de istudiu;
  • Po s’assentare a s’Universidade sa prima olta e po sos annos a sighire;
  • Po sas tassas de s’Universidade;
  • Po sos sos pianos de istudiu e po incurtzare su percursu de s’istudiu;
  • Po leare sas pergamenas, sos libretos e sos pabilos cheppare a-i cussos lassaos in sa Segreteria;
  • Po ennere o po si che andare da-e un ateru cursu o da-e un atera Facultade, o da-e Universidade istranza;
  • Chie acabat de esser istudente;
  • Po renuntziare a sos istudios.

Totu sos pabilos si agatan on-line o si poden leare in s’ufitziu de sa Segreteria.Sos chi cheren faeddare cun sa Segreteria po preguntare novas, po signolare su chi non andat bene o po calchi cunsitzu, poden iscriere a sa mail: segrstudlettere@unica.it o poden sighire su caminu chi si jamat “Richieste e Segnalazioni” de custu blog. 


[1] Custas novas funti stettias iscrittas de Fabrizio Mattana (Segreteria de is istudiantis) po sa parti in Campidanesu e de Lucia Cossu (Uffitziu po s’Orientamentu) po sa parti in Logudoresu cun s’agiúdu de is Professoris Giulio Paulis e Maurizio Virdis.